हरिः ओम्

Select Sloka Script in Devanagari / Telugu/ Kannada/ Gujarati /English

ಸುಂದರಕಾಂಡ.
ಅಥ ಸಪ್ತಮಸ್ಸರ್ಗಃ

ಸ ವೇಶ್ಮಜಾಲಂ ಬಲವಾನ್ ದದರ್ಶ ವ್ಯಾಸಕ್ತ ವೈಢೂರ್ಯಸುವರ್ಣಜಾಲಮ್|
ಯಥಾಮಹತ್ಪ್ರಾವೃಷಿ ಮೇಘಜಾಲಮ್ ವಿದುತ್ಪಿನದ್ಧಂ ಸವಿಹಂಗಜಾಲಮ್||1||

ನಿವೇಶನಾನಾಂ ವಿವಿಧಾಶ್ಚಶಾಲಾಃ ಪ್ರಧಾನಶಂಖಾಯುಧಚಾಪಶಾಲಾಃ|
ಮನೋಹರಾಶ್ಚಾಪಿಪುನರ್ವಿಶಾಲಾಃ ದದರ್ಶ ವೇಶ್ಮಾದ್ರಿಷು ಚಂದ್ರಶಾಲಾಃ||2||

ಗೃಹಾಣಿ ನಾನಾವಸುರಾಜಿತಾನಿ ದೇವಾಸುರರೈಶ್ಚಾಪಿ ಸುಪೂಜಿತಾನಿ|
ಸರ್ವೈಶ್ಚ ದೋಷೈಃ ಪರಿವರ್ಜಿತಾನಿ ಕಪಿರ್ದದರ್ಶ ಸ್ವಬಲಾರ್ಜಿತಾನಿ||3||

ತಾನಿ ಪ್ರಯತ್ನಾಭಿಸಮಾಹಿತಾನಿ ಮಯೇವ ಸಾಕ್ಷಾದಿವ ನಿರ್ಮಿತಾನಿ|
ಮಹೀತಲೇ ಸರ್ವ ಗುಣೋತ್ತರಾಣೀ ದದರ್ಶ ಲಂಕಾಧಿಪತೇರ್ಗೃಹಾಣಿ||4||

ತತೋ ದದರ್ಶೋಚ್ಛ್ರಿತಮೇಘರೂಪಮ್ ಮನೋಹರಂ ಕಾಂಚನಚಾರುರೂಪಮ್|
ರಕ್ಷೋsಧಿಪ ಸ್ಯಾತ್ಮಬಲಾನುರೂಪಮ್ ಗೃಹೋತ್ತಮಂ ಹ್ಯಪ್ರತಿರೂಪರೂಪಮ್||5||

ಮಹೀತಲೇ ಸ್ವರ್ಗಮಿವ ಪ್ರಕೀರ್ಣಮ್ ಶ್ರಿಯಾಜ್ವಲಂತಂ ಬಹುರತ್ನ ಕೀರ್ಣಮ್|
ನಾನಾತರೂಣಾಂ ಕುಸುಮಾವಕೀರ್ಣಮ್ ಗಿರೇರಿವಾಗ್ರಂ ರಜಸಾವಕೀರ್ಣಮ್||6||

ನಾರೀಪ್ರವೇಕೈರಿವ ದೀಪ್ಯಮಾನಮ್ ತಟಿದ್ಭಿ ರಂಭೋದವ ದರ್ಚ್ಯಮಾನಮ್|
ಹಂಸಪ್ರವೇಕೈರಿವ ವಾಹ್ಯಮಾನಮ್ ಶ್ರಿಯಾಯುತಂ ಕೇ ಸುಕೃತಂ ವಿಮಾನಮ್||7||

ಯಥಾ ನಗಾಗ್ರಂ ಬಹುಧಾತುಚಿತ್ರಮ್ ಯಥಾ ನಭಶ್ಚ ಗ್ರಹಚಂದ್ರಚಿತ್ರಮ್|
ದದರ್ಶಯುಕ್ತೀಕೃತ ಮೇಘಚಿತ್ರಮ್ ವಿಮಾನರತ್ನಂ ಬಹುರತ್ನ ಚಿತ್ರಮ್||8||

ಮಹೀಕೃತಾ ಪರ್ವತರಾಜಿಪೂರ್ಣಾ ಶೈಲಾಃ ಕೃತಾ ವೃಕ್ಷವಿತಾನಪೂರ್ಣಾ|
ವೃಕ್ಷಾಃ ಕೃತಾ ಪುಷ್ಪವಿತಾನಪೂರ್ಣಾಃ ಪುಷ್ಪಂ ಕೃತಂ ಕೇಸರ ಪತ್ರ ಪೂರ್ಣಮ್||9||

ಕೃತಾನಿ ವೇಶ್ಮಾನಿಚ ಪಾಂಡುರಾಣಿ ತಥಾಸುಪುಷ್ಪಾಣಪಿ ಪುಷ್ಕರಾಣಿ|
ಪುನಶ್ಚ ಪದ್ಮಾನಿ ಸ ಕೇಸರಾಣಿ ಧನ್ಯಾನಿ ಚಿತ್ರಾಣಿ ತಥಾ ವನಾನಿ||10||

ಪುಷ್ಪಾಹ್ವಯಂ ನಾಮ ವಿರಾಜಮಾನಂ ರತ್ನಪ್ರಭಾಭಿಶ್ಚ ವಿವರ್ಥ ಮಾನಮ್|
ವೇಶ್ಮೋತ್ತಮಾನಾ ಮಪಿ ಚೋಚ್ಚಮಾನಮ್ ಮಹಾಕಪಿಸ್ತತ್ರ ಮಹಾವಿಮಾನಮ್||11||

ಕೃತಾಶ್ಚ ವೈಢೂರ್ಯಮಯಾ ವಿಹಂಗಾಃ ರೂಪ್ಯಪ್ರವಾಳೈಶ್ಚ ತಥಾ ವಿಹಂಗಾಃ|
ಚಿತ್ರಾಶ್ಚ ನಾನಾವಸುಭಿ ರ್ಭುಜಂಗಾಃ ಜತ್ಯಾನುರೂಪಾಸ್ತುರಗಾ ಶ್ಶುಭಾಂಗಾಃ||12||

ಪ್ರವಾಳಜಾಂಬೂನದಪುಷ್ಪಪಕ್ಷಾ ಸ್ಸಲೀಲ ಮಾವರ್ಜಿತಜಿಹ್ಮಪಕ್ಷಾಃ|
ಕಾಮಸ್ಯ ಸಾಕ್ಷಾದಿವ ಭಾಂತಿ ಪಕ್ಷಾಃ ಕೃತಾವಿಹಂಗಾ ಸ್ಸುಮುಖಾಸ್ಸುಪಕ್ಷಾಃ||13||

ನಿಯುಜ್ಯಮಾನಾಸ್ತು ಗಜಾಸ್ಸುಹಸ್ತಾಃ ಸ ಕೇಸರಾಶ್ಚೋತ್ಪಲಪತ್ತ್ರಹಸ್ತಾಃ|
ಬಭೂವ ದೇವೀ ಚ ಕೃತಾ ಸುಹಸ್ತಾ ಲಕ್ಷ್ಮೀಸ್ತಥಾ ಪದ್ಮಿನಿ ಪದ್ಮಹಸ್ತಾ||14||

ಇತೀವ ತದ್ಗೃಹಮಭಿಗಮ್ಯ ಶೋಭನಮ್ ಸವಿಶ್ಮಯೋ ನಗಮಿವ ಚಾರು ಶೋಭನಮ್|
ಪುನಶ್ಚ ತತ್ಪರಮಸುಗಂಧಿ ಸುಂದರಮ್ ಹಿಮಾತ್ಯಯೇ ನಗಮಿವ ಚಾರುಕಂದರಮ್||15||

ತತಸ್ಸ್ ತಾಂ ಕಪಿ ರಭಿಪತ್ಯ ಪೂಜಿತಾಂ ಚರನ್ ಪುರೀಂ ದಶಮುಖಬಾಹುಪಾಲಿತಾಮ್ |
ಅದೃಶ್ಯತಾಂ ಜನಕಸುತಾಂ ಸುಪೂಜಿತಾಮ್ ಸುದುಃಖಿತಃ ಪತಿಗುಣವೇಗವರ್ಜಿತಾಮ್||16||

ತತಸ್ತದಾ ಬಹುವಿಧಭಾವಿತಾತ್ಮನಃ ಕೃತಾತ್ಮನೋ ಜನಕಸುತಾಂ ಸುವರ್ತ್ಮನಃ|
ಅಪಶ್ಯತೋsಭವ ದತಿದುಃಖಿತಂ ಮನ ಶ್ಶುಚಕ್ಷುಷಃ ಪ್ರವಿಚರತೋ ಮಹಾತ್ಮನಃ||17||

ಇತ್ಯಾರ್ಷೇ ಶ್ರೀಮದ್ರಾಮಾಯಣೇ ಆದಿಕಾವ್ಯೇ ವಾಲ್ಮೀಕೀಯೇ
ಚತುರ್ವಿಂಶತ್ ಸಹಸ್ರಿಕಾಯಾಂ ಸಂಹಿತಾಯಾಮ್
ಶ್ರೀಮತ್ಸುಂದರಕಾಂಡೇ ಸಪ್ತಮಸ್ಸರ್ಗಃ||
|| Om tat sat ||